ජ්‍යොතිෂය පිළිබඳ අවබෝධයක්
ආයුබෝවන්.
මම මෙම ලිපිය පළ කරන්නේ ජ්‍යොතිෂය සම්බන්ධයෙන් යම් කුතුහලයකින් හෝ තම ජන්ම කේන්ද්‍ර සටහන පිළිබඳ අනවබෝධයකින් සිටින අයෙකුට කියවීම පිණිසය. ජ්‍යොතිෂය පිළිබඳව මා සතු දැනුම හා අත්දැකීම් අනුව, එය පිළිබඳව සරලව යමක් පැහැදිලි කර දීම මෙහි අරමුණයි.
මා ජ්‍යොතිෂය ඉගෙන ගත්තේ මීට අවුරුදු 21කට පමණ පෙර පානදුර ප්‍රදේශයේ විසූ ජ්‍යොතිෂාචාර්යවරයකුගෙනි. ඒ වන විට අපොස උසස් පෙළ හදාරීමෙන් පසුව, මම පරිගණක විද්‍යාව පිළිබඳ උසස් ඩිප්ලෝමාවක්ද හදාරමින් සිටියෙමි.
එම කාලයේදී පරිගණකය භාවිතයෙන් සත්‍ය කීමේ ක්‍රමවේදයක් කිසියම් පිරිසක් විසින් අත්හදා බලමින් සිටින බව මට විටින් විට අසන්නට ලැබුණි. ජ්‍යොතිෂ විද්‍යාව පිළිබඳ පුවත්පත් කියවීමෙන් ලද තොරතුරුවලට අනුව, ඒ පිළිබඳව තවදුරටත් හැදෑරීමේ ආශාවක්ද මා තුළ ඇති විය.
මා ඉහත සඳහන් කළ ගුරුතුමා හමුවූයේද මෙම කාලය තුළදීය.
මගේ තොරතුරු අසා, එතුමා මා හට ජ්‍යොතිෂය කරණ ටිකෙන් ටික පැහැදිලි කර දුන්නේය. තමන් ලද දැනුමෙන් හිස උදුම්මා නොගත් එතුමාගේ ගුරුහරුකම් තුළින් මා දුටුවේ ගෞරවනීය ජ්‍යොතිෂ ශාස්ත්‍රඥයකු මෙන්ම ගෞරවනීය විශ්‍රාමික ගුරු පියෙකුදය.
මා මෙසේ සඳහන් කරන්නේ, ජ්‍යොතිෂය පිළිබඳ මා තුළ ඇති වූ අවබෝධයට මූලික වූයේ පොතකින් පමණක් ලබාගත් දැනුමක් නොව, එය ප්‍රායෝගිකව අධ්‍යයනය කරමින් සිටි ගුරුතුමකුගෙන් ලද දිගුකාලීන මඟපෙන්වීමක් බව පැහැදිලි කිරීමටය.
ජ්‍යොතිෂ ශාස්ත්‍රය යනු එකහෙළා ප්‍රතික්ෂේප කළ හැකි දෙයක් නොව, විශේෂිත වූ විද්‍යාත්මක පරීක්ෂණ සමූහයක සාර්ථක වූ ප්‍රතිඵල සමූහයක් ලෙස ඇතැම් අය විසින් සලකනු ලබන විෂය ක්ෂේත්‍රයකි. මේ මොහොතේදීත් නොයෙක් ස්ථානවල, නොයෙක් කණ්ඩායම් විසින් පරීක්ෂණ පවත්වමින් තවදුරටත් අධ්‍යයනය වෙමින් පවතින විෂයයක් ලෙස එය සැලකිය හැකිය.
මතුපිටින් ඔබට පෙනෙන රවි, චන්ද්‍ර, කුජ, බුධ ආදී ග්‍රහ මණ්ඩලයෙන්ද, මේෂ, වෘෂභ, මිථුන ආදී ලග්නාධි රාශිවලින්ද පමණක් ජ්‍යොතිෂය සමන්විත නොවේ. ඒ සියල්ල ඇතුළත විශාල ගණනය කිරීම් හා සම්බන්ධතා රාශියකින් සමන්විත ජ්‍යොතිෂ විද්‍යාත්මක රටාවක්ද අන්තර්ගතව පවතී.